Manchu/Lesson 13 - Reading 1

Text edit

dorgi yamun i aliha bithei da, taiboo, ilaci jergi be, amban ortai sei gingguleme wesimburengge, hese be gingguleme dahara jalin, abkai wehiyehe ningguci aniya nadan biyai orin emu de hese wasimbuhangge. tongki fuka akv hergen, daci manju bithei fulehe, te aika emu yohi bithe banjibume arafi asaraburakv oci, amaga inenggi burubufi niyalma gemu manju bithe daci tongki fuka akv hergen ci deribuhengge be sarkv ombi. ortai, sioi yuwan meng de afabufi, tongki fuka akv hergen i dangse be tuwame, eici juwan juwe uju be dahame emu yohi bithe banjibume arafi, eici adarame emu yohi bithe arafi, uksun, giroi tacikv, guwe dzy giyan yamun i geren tacikv de emte yohi sarkiyafi asarabukini. sehebe gingguleme dahafi, amban be dorgi yamun i ku de asaraha tongki fuka akv hergen i dangse be kimcime tuwaha, te udu ere hergen be baitalarakv bicibe, manju hergen yargiyan i ereci deribuhengge, jai jakvn gvsai nirui sekiyen, sirara hafan buhe turgun yooni ere dangse de ejehebi. ere dangse i hergen tongki fuka akv teile akv, geli teodenjeme baitalahangge bi. dergi fejergi hergen de acabume gvnin gaime kimcime tuwarakv oci, ja i takarakv. te ejen hese wasimbufi, bithe banjibume arafi asaraburengge, yargiyan i manju hergen i da sekiyen be enteheme buruburakv obure ferguwecuke gvnin. amban be ejen i hese be gingguleme dahafi, ere dangse i dorgi tongki fuka akv sindame hvlaci, uthai takaci ojoro hergen ci tulgiyen, te i hergen ci encu, takara de mangga hergen be yooni tukiyefi, te i hergen kamcibufi. Juwan juwe uju be dahame, emu yohi bithe banjibume arafi, dele tuwabume wesimbuhe, ejen jorime tacibuha manggi, dorgi yamunde emu yohi asarabureci tulgiyen, uksun, giroi tacikv, guwe dzy giyan yamun i geren tacikv de emte yohi sarkiyame gamabufi asarabufi, amaga urse be, manju bithe daci ere hergen ci deribuhengge be askini, geli baicaci. ere dangse aniya goidare jakade, umesi manahabi, ere enteheme goidame asarara dangse be dahame, adaha tome hooshan jibsime biyoolafi dasame kiyalafi asarabuki sembi, erei jalin gingguleme wesimbuhe hese be baimbi seme abkai wehiyehe ningguci aniya omshon biyai juwan emu de aliha bithei da taiboo ilaci jergi be ortai, aliha amban i jergi taidzy shooboo sioi yuwan meng wesimbuhede ineku inenggi hese wasimbuhangge jedzy be bithei juleri ara erei songkoi ilan dobton arafi dolo benju gvwa be gisurehe songkoi obu sehe.

Translation edit

Vocabulary edit

Notes edit

Lesson 12 (The Manchu Script) ---- Contents ---- Lesson 14 (Reading 2)