Interlingua/Curso de conversation/Capitulo 7, Scenas 3 e 4 (interlingua)
SCENA 3: Geneva, in le automobile de Petro: In iste breve scena Petro apporta Catherina a su appartamento. Illa dice gratias a ille pro le repasto e le bibita postea in le cabaret. Petro offere apportar la a un altere cabaret pro un ultime bibita, ma Catherina dice que illa vole sentir se in bon forma le die sequente e prefere vader directemente a su appartamento.
Petro essaya persuader la a invitar le pro un cafe in su appartamento, ma Catherina obviemente non vole riscar un incontro romantic iste vespere. Petro tunc suggere que illes sorte le proxime vespere, ma Catherina non vole committer se a ullo. Illes dice bon nocte e Petro vade via.
Catherina: Eh, ben, multe gratias pro invitar me a sortir con vos iste vespere, Petro.
Petro: Illo esseva un placer.
Catherina: Le restaurante esseva excellente. E le cabaret anque esseva multo sympathic.
Petro: On pote prender un bibita final si vos vole. Il ha altere cabarets in iste area.
Catherina: No, io crede que io debe vadera a mi appartamento.
Petro: Vermente?
Catherina: Si. Io vole sentir me ben deman.
Petro: Bon.
Catherina: Io regretta multo que vos non ha potite dansar.
Petro: Oh, illo non es multo importante. Nos potera facer illo un altere vice.
Catherina: Ben. Bon nocte, e gratias un altere vice.
Petro: Vos non va invitar me a vostre appartamento pro un caffe?
Catherina: No. Io non crede que illo esserea un bon idea a iste hora.
Petro: Illo non es multo gentil.
Catherina: Io lo regretta multo, ma un caffe poterea facilemente ducer a altere cosas, e ...
Petro: E qual esserea le mal in illo?
Catherina: No. Io spera que vos comprendera ben que io debe dormir ben con omne lo que nos debera facer deman.
Petro: Esque nos poterea sortir deman per le vespere?
Catherina: Possibilemente. Que nos discute iste possibilitate deman.
Petro: Multo ben.
Catherina: Io tunc vos videra in le officio deman.
Petro: Si, naturalmente. Usque deman.
Catherina: Bon nocte e gratias.
Petro: Bon nocte.
EXERCITIO 3: Dicer a revider.
Un femina: Illes vade via in iste momento. Que va dicer ille?
Un homine: Eh ben, "bon vespere". E que va dicer illa?
Un femina: "Bon vespere. E gratias." Esque ille va parlar del die sequente?
Un homine: "Io vos videra deman? Nos nos videra deman?" Que va dicer illa?
Un femina: "Si. Io vos videra deman. Nos nos videra deman." E ille, esque le vespere ha placite a ille? Si isto es ver, que dicerea ille?
Un homine: "Gratias pro le vespere multo bon." E illa, esque le vespere ha placite a illa? Si isto es ver, que dicerea illa?
Un femina: "Io ha passate un vespere vermente excellente." Illes nunc vade via, le un ex le altere. In iste caso, que dicerea illes?
Un homine: Bon nocte.
Un femina: Bon nocte.
Un homine: Dormi ben.
Un femina: Gratias. E anque vos.
Un homine: A deman.
Un femina: Si, a deman.
Guida: Bon. Ha venite le matino quando Catherina e omne le equipa del officio de Geneva va conferer con le senior Chahine a su hotel.
SCENA 4: In le officios de Geneva e le hotel del
senior Chahine: Omnes se trova in le officio preste
a partir pro le hotel del senior Chahine. Martijn
vole informationes ex Petro sur lo que ille e Catherina
faceva le nocte anterior, ma Petro non dice ullo
a ille sur isto. Catherina arriva al officio.
Como su automobile es un pauco parve pro quatro
personas, Martijn offere portar Olivero al hotel
in su proprie automobile de maniera que Catherina
pote portar Petro illac in le sue.
Quando illes arriva al hotel, Catherina telephona Mohammed in su camera pro notificar le que illes ha arrivate, e illes ascende pro vider le. Mohammed es multo felice de vider Catherina, que ille non ha vidite desde ante cinque annos. Catherina introduce Mohammed a su tres collegas. Ille les invita in su suite e tunc ordina caffe pro sex personas.
Martijn: Bon die, Petro.
Petro: Bon die, Martijn.
Martijn: Como sta tu?
Petro: Multo ben, gratias.
Martijn: Tu te ha ben amusate heri per le vespere?
Petro: Si, multo ben, gratias.
Martijn: Conta me toto.
Petro: Que vole tu dicer?
Martijn: Eh, ben, que ha facite tu con nostre chef?
Petro: Oh, io non vole discuter lo.
Martijn: Si, multo ben.
Catherina: Bon die a totos.
Le alteres: Bon die.
Catherina: Omne vos es preste?
Le alteres: Si.
Catherina: Nos debera vader al hotel ante multe tempore.
Martijn: Ubi es Olivero?
Catherina: Ille non es in le officio in iste momento, ma ille es preste. Como vadera nos illac? Mi automobile es un pauco parve pro quatro.
Martijn: Bon, ... eh, si tu vole, io poterea apportar Olivero illac in mi automobile e vos e Petro poterea vader illac in le vostre.
Petro: Multo ben.
Martijn: Nos pote incontrar nos in le area de reception del hotel.
Catherina: Bon idea.
IN LE HOTEL:
Petro: Vos cognosce le numero de su camera?
Catherina: Ille non ha un camera. Ille ha un suite.
Petro: Vermente? Ma cognosce vos le numero?
Catherina: Si. Cinque centos dece tres. Io va dicer al receptionista que nos va illac. Excusa me.
Receptionista: Un minuta, per favor. ... Que pote io facer pro vos?
Catherina: Esque vos pote telephonar le suite cinque centos dece tres pro dicer que nos va illac, per favor?
Receptionista: Il ha un telephono interior. Illo es illac. Vos pote vider lo?
Catherina: Si, gratias. (Catherina vade al telephono.) Mohammed? Il es io, Catherina. Nos es in le hotel in le area de reception. Si. Immediatemente. (A su collegas) Ecce le ascensores. Que nos vade illac.
Petro: Si.
Catherina: Ecce su suite.
Mohammed: Catherina! Vider vos me face multo placer. Como sta vos?
Catherina: Multo ben, Mohammed, gratias. E vos?
Mohammed: Omne vade ben per me. Que vos entra. Un periodo de annos ha passate desde le ultime vice que nos nos videva.
Catherina: Si. Il me pare que il ha essite al minus cinque annos.
Mohammed: E vos. Omne anque va ben pro vos?
Catherina: Si multo ben, gratias.
Mohammed: Il pare que vos ha portate con vos omne vostre equipa?
Catherina: Si. Io vole presentar a vos Petro, nostre ingeniero.
Petro: Bon die, senior.
Mohammed: Oh, appella me Mohammed.
Catherina: E ecce Olivero, nostre contabile ...
Mohammed: Bon die, Olivero.
Catherina: ... e Martijn, qui se occupa con marketing.
Mohammed: Bon die, Martijn. Que vos entra omnes e vos sede. (Mohammed vade al telephono e prende le receptor.) Esque vos pote nos apportar caffe, per favor? Gratias. Pro cinque personas, per favor. Multe gratias.
EXERCITIO 4: Renovar contactos personal.
Guida: Catherina e Mohammed pare esser amicos vetule. Que nos ascolta lo que amicos vetule dice inter se.
Prime homine: Esque tu vide ille femina illac?
Secunde homine: Si.
Prime homine: Illa resimila Christina de multe manieras.
Secunde homine: Qui es illa? Christina? Illa pare cognoscer te. Illa te face un signo.
Prime homine: Illa debe esser Christina. Io va vader illac pro parlar con illa.
Secunde homine: Ille va demandar a illa como illa sta.
Prime homine: Christina, como sta tu?
Secunde homine: Illa va dicer que illa sta multo ben.
Un femina: Io sta multo ben, e tu?
Prime homine: Anque multo ben, gratias.
Secunde homine: Illa va dicer que illa non la ha vidite desde multo tempore.
Un femina: Nos non nos ha vidite desde multe tempore.
Prime homine: Si. Le ultime vice que nos nos videva esseva ante unes annos.
Un femina: Si. Io crede que illo es desde tres annos.
Secunde homine: Ille va corriger la.
Prime homine: Oh, plus que illo. Io crede que le ultime vice que nos nos videva esseva ante cinque annos.
Secunde homine: Illa va exprimer su surprisa.
Un femina: Tanto tempore como illo?
Prime homine: Oh si, cinque annos al minus, o forsan plus que cinque annos.
Secunde homine: Ille va dicer a ille ubi illos se cognosceva le prime vice.
Prime homine: Nos nos cognosceva in London le prime vice. Vos memora illo?
Secunde homine: Nunc ille va presentar me a illa.
Prime homine: Io te presenta Paul, un amico mie.
Un femina: Bon die, Paul.
Secunde homine: Bon die, Maria.
Un femina: Io crede que nos nos cognosce. Nos nos videva le ultime vice a Athenas ante cinque annos.
Secunde homine: Si, illo es ver. Nos certemente vive in un mundo parve, nonne?
Guida: Ben, io nunc vole saper como vadeva le reunion.